Распродажба на блуд, ниски страсти, пеплосани спомени, што како никогаш ненајадени мршојади кружат врз вистината, а таа е болна, гадна, гладна, убиствена... Се случувала некогаш и некаде, секогаш и секаде, сега, тука и овде... Квазиграндиозноста на убиствените мозоци, на империјата Глембаеви е сеприсутно... Среброљубието е само одраз на искривеното огледало на самољубието и моќта. Неизнајдената маска, која упорно се наметнува врз болката на изгубениот, глупав, немоќен, неук син, за кого таткото е само човечка вреќа пари... И како што обично бива во овие наши балкански приказни, не може и не смее да се заврши на добро. Колку и е да е целата приказна зрела, макар и искарикирана за среќен крај или светски кажано хепи-енд, нема место! Тој тука, сега, овде, па ни во Драмскиот не беше присутен, иако шоуто продолжи...
Во светот на нашите Глембаеви мошне умешно и вешто со голема гротескна филозофија, црн хумор, но и сенс за трилер ситуација и драма, не внесе одличниот Венко Андоновски, кој уште еднаш се потврди како врвен мајстор на нашата (и не само наша) драматика...
Станува збор за целосно изворен текст без разлика што го поврзуваат со „Господа Глембаеви“, нуди дијагноза на нашето време, вели Венко Андоновски
Без национална драма нема национален театар. Голема сценска реализација со големи актери ќе проследи публиката на „Генетика на кучињата“ по текст на Венко Андоновски, а во режија на Дејан Пројковски од 11 април во Драмскиот театар во Скопје - рече директорот Бранко Ѓорчев.
Андоновски најави целосно изворен текст со две позајмени имиња од „Господа Глембаеви“.
- Станува збор за целосно изворен текст без разлика што го поврзуваат со „Господа Глембаеви“. Нуди дијагноза на нашето време. Ова е, пред с`, претстава на актери, го покажува патот на злото и на парите и колку тие може да н` отчовечат. Претставата не е само театарски чин, преку соработка на актерски генерации овде се прикажува судирот на генерациите. Во пишувањето на текстот апсолутно не се водев по тоа кој ќе игра во претставата – истакна Андоновски.
Светскиот ден на театарот, 27 март, не можеше да се одбележи подобро отколку со отворање нов театар. Чест е за сите нас што сме дел од театарот „Комедија“.
Се надеваме дека ќе ги надминеме величините на славните комедии коишто со години се играле во Драмски, како што беше „Солунски патрдии“. Ќе растеме со секоја наредна претстава, ќе имаме добар репер по кој ќе се движиме, рече Јелена Жугиќ, директорка на театарот.
Првата претстава на националниот театар „Комедија“, „Ах, љубов моја (турска приказна)“, е по текст и режија на Коле Ангеловски. Ова не е прв театар што бил отворен со негова претстава, пред 21 година со негово дело беше отворен и Театарот за деца и младинци.
- Имам чест што со моја претстава ќе биде отворен театарот. Конечно ми се исполни желбата да се отвори театар за комедија, жанрот на кој го имам посветено животот. Текстот е парафраза на трендот на нашите телевизии, кои се полни со турски серии. Во сите нив клучна тема е љубовта. Пишувајќи го текстот бев многу под влијание на Фејдо, кој користи многу врати во сценографијата. Се радувам што работев со млади актери, а не со Дади, Мешко, Ванчо, со кои требало само да им го дадам текстот, оти со нив човек не може да режира – рече Ангеловски.
